Gjennom utstillinga kan publikum oppleve produkt laga på kurs i regi av husflidslaget, men også arbeid som er inspirerte av aktivitetane og miljøet laget har bygd opp gjennom generasjonar. Her blir det vist fram alt frå bunader, dåpsteppe og kjøkkenhandkle til vottar, nissar, juletrepynt, strikkearbeid, keramikk og trearbeid.

Utstillinga gir eit unikt innblikk i korleis tradisjonshandverk har utvikla seg over tid, samstundes som den syner korleis gamle teknikkar stadig får nytt liv gjennom nye generasjonar av handverkarar og husflidsentusiastar.

Men dette blir langt meir enn ei tradisjonell utstilling. Publikum får høve til å møte husfliden på nært hald. Gjennom veka blir det ulike aktivitetar der besøkande kan delta, lære og prøve sjølve. Ein dag blir det demonstrasjon av stopping av sokkar, eit handverk som har fått fornya aktualitet i ei tid med auka fokus på gjenbruk og berekraft.

Ein vev blir sett opp i utstillingslokalet slik at både store og små kan sjå korleis vevarbeid går føre seg og få prøve seg på teknikken. Det blir også rom for strikk, prat og gode historier frå gamle dagar. Husflidslaget tek fram delar av arkivet sitt, og nokre av dei gamle permane blir lagde fram slik at publikum kan bla i historia og mimre over aktivitetar, kurs og arrangement opp gjennom åra.

For mange vil utstillinga vere eit møte med eigne minne, medan andre får høve til å oppdage handverksteknikkar og tradisjonar dei kanskje aldri har sett før.

Midtre Sunnfjord Husflidslag sitt program under jubileumsveka

Jubileumsutstillinga er open fleire dagar gjennom jubileumsveka på Førdehuset. I tillegg inviterer Midtre Sunnfjord Husflidslag til foredrag, kurs og handverksdemonstrasjonar.

Program

Søndag 25. oktober; 

• Høgtideleg opning av utstillinga kl. 14.00

Måndag 26. oktober

• Open utstilling kl. 18.00–20.00

Tysdag 27. oktober

• Open utstilling kl. 18.00–20.00

Onsdag 28. oktober

• Open utstilling kl. 12.00–14.00
• Open utstilling kl. 17.00–19.00

Torsdag 29. oktober

• Open utstilling kl. 11.00–13.00
• Foredrag med Knittingtradition og trekking av haustlotteriet kl. 18.00–19.30

Fredag 30. oktober

• Open utstilling kl. 18.00–20.00

Laurdag 31. oktober

• Utstilling kl.14-16 (Fixe-damer viser fram korleis stoppe sokkar o.l)

Søndag 1. november

• Siste dag for utstillinga, open kl. 14.00–18.00

Husflidslaget håpar mange tek turen innom i løpet av veka, enten dei er gamle medlemmer, handverksinteresserte eller berre nysgjerrige på kva som har vorte skapt gjennom snart 50 år med husflidsglede i Førde.

Vel møtt til jubileumsutstilling og ei reise gjennom nær 50 år med handverk, tradisjonar, kreativitet og fellesskap!